Tura, April 18: Skotong Minister Conrad K. Sangma, da•alo uni nok Turao Garo Hills-oni jemangan 2026 bilsini SSLC porikkao nambee chu•sokahachim, uamangko mande ra•ani baksa kusi ong•chake mitelpilskaani program-ko ong·atangaha.
Ia bilsini porikkao jemangan kosakbatgipa biaprangko man•e chu•sokaha uamangko gisik ra•e kusi ong·chakpaani gita ua ia programme-ko ong•ate mitelpilskaaniko dakataha. Uni kusi ong•chakaniko janapengon Skotong Minister chatro-chatrirangko uamangni rake krenganina, kringkrot jotton ka•anina, watgalgijanina aro kim•kimanina mittele, uamangni chu•sokaniara uamangni nokdangrangnasan rasongko ra•baaija indiba jolgimikna aro a•doknaba ong•a ine aganangaha.
Ua tom•bimonganio jinmana aganengon, mikkangchi dakgnirangoba miksongani tongtong ong•china aro nambee chu•sokna tikkelangkuchinaba ua didiataha. A•dokni mikkangchi bimang ong•gnina lekka-pora bidani gamchatgipa ong•aniko janape chadambe chu•sokgiparangko uamangni u•i-masiani aro changa-sapanirangko songsalna on•gilchina ua ku•pattiataha.
Chatro-chatrirangko dilanio aro dakchakanio ma•a-parangni, skigiparangni aro skulrangni gisiknange bak on•paahaniba ua mittelaha. Jinma ku•cholsan jotton ka•anian skia-poraianiko ba education system-ko bilakatani baksana Meghalaya-o namgipa skie ra•aniko mangrakbatatani ong•a ine ua janapataha. “Bi•sarangko uamangni songrea gadangantio chakpaanian mongsonggipa ong•engon, skia-poraiani aro skul college-o napaniba gamchatgipa ong•a aro uamangni dakbewal aro mikkangchi re•gniko tarianiba gamchatbegipa ong·a, apsan daken mikkangchini a•dok aro a·songnaba gamchatbegipa ong•a,” ine ua aganaha.
Program ong•miting somoio balwa-mikka waaniko janapjole, janggi tangani ra•bianiarangoba apsan daken ong•a, maina neng•nikanirangara gelna man·gijagipa janggi tangani bakan ong•a ine Skotong Minister aganangaha. An·chingni dakna nangchongmotgipa kamde chakchikani aro kim•kim ong•anisa ine ua janapangaha. “Ra•bianirang pangnan sokbaaigen, indiba an•chingko parakgipade uarangko an•ching maikai mikkangpaa uasa – mangrake dongani, kim•kim ong•ani aro pangnaba watgalgijanisa,” ua aganaha.
Cholon-bewal aro dakbewalrangni mongsong ong•aniko talatengon, chong•motgipa chu•sokanide name mandesal ong•e janggi tanganiosa pangchaka ine Skotong Minister agan-talate on·angaha. “Sontol aro an·tangko onate janggi tangjaode maming chu•sokaniba orto dongja. Dal•batgiparangko mande ra•ani aro an•tangni ja•dil-ja•pang baksa meli-nangrimanisa nama janggi tanganio nangchongmotgipa bewalrang ong•a,” ine ua aganaha.
An·tangko onatani gri chu•sokanide matchotsrangaona dilja ine mikrakataniko on·engon, cholon-bewal, sontol ong·ani aro kakket ong•anirangsa orto gnanggipa janggi tanganina nangchongmotgipa ong•a ineba ua talatdapaha.
Skotong Minister, sokbagipa sakantikon mittele aganengon, ua chatro-chatrirangna, ma•a-parangna aro skigiparangna mikkangchi chu•sokroroangchina uni namgipa sikanirangko on•e uni agananiko matchotataha.
Ia programme ong•atanio, topper-rangna certificate aro mittelpilani boksisrangko uamangni nambee chu•sokaniko gisik ra•ani gita suale on·angaha.
Na·simang iakoba nina man·gen:
Na·simang iakoba poraina man·gen: Tynsong Wahiajer-o Kror 100-ni project-ko oprake aro kror 29-ni kamrangna pangchakani ro·ongrangko songe on·a
na·simang hubnetwork.in, oniko video-ko niangan baksa poraina man·gen.
Chingko ka·mao mesokgipa social mediarango jarikna man·gen:-
Twitter- twitter.com/nemediahub
Youtube channel- www.youtube.com/@NortheastMediaHub2020
Instagram- www.instagram.com/ne_media_hub
Source link
#Garo #Hillso #SSLC #Topperrangni #namprete #chusokanina #kusi #ongpaa
